د کابل اوسېدونکي د دولتي او خصوصي ګاز د بیې د نه توپیر له امله شکایت لري
یو شمېر د کابل ښار اوسېدونکي وايي، سره له دې چې مایع ګاز د امارتي شرکتونو له لوري په بېلابېلو ناحیو کې وېشل کېږي، خو د دولتي او خصوصي ګاز بیې له یو بل سره توپیر نه لري او د بیو په کچه کې د پام وړ کموالی نه دی راغلی.
د دغو اوسېدونکو په وینا، د دولتي ګاز د وېش موخه د بیو کنټرول او له اقتصادي فشارونو سره د خلکو مرسته ښودل شوې وه، خو دا بهیر نهدی توانېدلی چې د کورنیو پر اقتصادي بوج بسیا اغېز وکړي. دوی له د طالبانو له مسؤلینو غواړي چې د ګاز د وېش او بیو ټاکلو بهیر ته جدي پاملرنه وکړي او د ارزانه ګاز د حقیقي لاسرسي زمینه برابره کړي.
له بله پلوه، امارتي شرکتونه چې د ګاز وېش چارې پرمخ وړي، ټینګار کوي چې د دې پروګرام اصلي هدف د مایع ګاز د بیې کنټرول، د بازار د نوسان مخنیوی او د مناسب نرخ په بدل کې د خلکو ته رسونه ده. د دغو شرکتونو په وینا، دولتي ګاز دا مهال د شاوخوا ۲۷۰ دوکانونو له لارې په کابل کې پلورل کېږي.
دغه موضوع په داسې حال کې راولاړېږي چې تر دې وړاندې د امارتي شرکتونو د شمال د ډبرو سکرو وېش په کابل او یوولسو نورو ولایتونو کې د بازار له نرخ ټیټ پیل کړی و؛ یوه هڅه چې تمه کېده د بیو د کنټرول نمونې په توګه د مایع ګاز په اړه هم د خلکو لپاره لا څرګندې پایلې ولري.
